男女之间，感情当中，有了算机，就失了真心。
礼拜天下半天，走过路过黄河路，看看野眼。除脱国际饭店后门口，买蝴蝶酥队伍依然弯弯曲曲直到50米开外，还有黄河路路牌下头拍照片个小姑娘、立勒勒马路浪做直播个阿姨爷叔，真是闹猛得来。乘地铁回屋里向，搭两个人擦肩而过，听到一句闲话讲：“侬讲讲看，宝总个真爱是铃子还是汪小姐……”果然是戏里戏外，繁花点点。
夜里追剧，已经习惯王家卫讲故事个方式，伊欢喜正过来倒过去，留点勿懂，留点勿响，其实是想让侬慢慢交去嗒味道。过日脚嘛，总归有前因有后果，侬眼门前看到个迭个一小截，或者是因，或者是果，颠来倒去，又是彼此个因果。
讲到泡饭，全世界侪晓得，上海人欢喜吃泡饭。其实啊，上海人欢喜伊，勿是因为营养好，也勿是因为味道好，是从前尴尬日脚里个急智。夜里向剩下来个一口饭，往往就是第二天个早饭。冷天，冷饭头拿开水淘一淘，热烔烔一碗下去，贪伊暖热。热天，冷开水冲进去泡一泡，吃伊个爽气。小菜么，就用隔夜菜过过唻。条件好点么，一碟萧山罗卜干酱麻油拌拌。再考究点么，买根油条回来，剪开，酱油蘸蘸。
所以啊，宝总勒勒夜东京吃个泡饭，绝对勿是平常人家过日脚个一碗泡饭。一盅泡饭配七八碟小菜，迭个绝对是铃子暗黜黜个一分女人心事。宝总勿见得勿晓得，所以伊讲，黄河路浪三只澳龙，勿及此地一碗泡饭。只不过迭种闲话一只耳朵进一只耳朵出就好了，勿要当真。隔岸观火个菱红就明明白白：男人个嘴巴哦。铃子呢，嘴硬骨头酥，有段辰光是邪气当真了。至少王家卫用两个画面漏了底：一是听到人讲，宝总有花头了，铃子揿计算器个手指头僵牢，一动勿动；听到人家再讲，勿是宝总有花头，手指头又动了。一是两家头个股东大会开好，铃子偏生要宝总帮伊拿大包小包拎转去，勒隔壁邻居眼门前穿过弄堂。迭个腔势，是逼宝总就范，严格讲起来，伊个泡饭有点像算计。男女之间，感情当中，有了算机，就失了真心。
再讲夜东京，开始也搞勿懂，为啥铃子明里暗里账目瞒报，要“坑”阿宝。阿宝总归笑笑，勿响。后来，看到阿宝落魄碰到迭个铃子，铃子贴心贴肺送温暖送运道。噢，懂了。畀宝总讲起来，是伊欠铃子交关。不过宝总思路一直就老清爽，用夜东京还，用钞票还。
唉，要接翎子啊，让男人觉着欠侬，侬已经输出一条横马路了。还好铃子聪明，及时止损，退一步海阔天空。
接下来，烧一镬上海泡饭。
一别冷饭头摆勒勒镬子里，清水倒下去，浸没冷饭，大火一烧滚，马上关火。冷一冷，就好盛出来吃了。迭能烧出来个泡饭，米归米，水归水，清清爽爽。假使烧两滚，笃一笃。乃末好，一碗泡饭就变成拖泥带水个一碗饭泡粥了。（作者：沈一珠；朗读：钱程）
本文链接：http://www.gihot.com/news-1-10170-0.html夜读 | 听钱程朗读：铃子、夜东京搭上海泡饭
声明：本网页内容由互联网博主自发贡献，不代表本站观点，本站不承担任何法律责任。天上不会到馅饼，请大家谨防诈骗！若有侵权等问题请及时与本网联系，我们将在第一时间删除处理。
上一篇：视频 | 豫园灯会，千灯启明！
点击右上角
微信好友
朋友圈
点击浏览器下方“
”分享微信好友Safari浏览器请点击“
”按钮
点击右上角
QQ
点击浏览器下方“”分享QQ好友Safari浏览器请点击“”按钮
